Кәсібилік, өз ісіне деген адалдық және үнемі даму жолындағы ұмтылыс – дәл осы қасиеттер Татьяна Николаевна Войнованы көптеген жылдар бойы ерекшелендіріп келеді
Ол өзінің кәсіби жолын 1994 жылы Өскемен медициналық училищесін «Медбике ісі» мамандығы бойынша үздік аяқтаудан бастады. 2000 жылы Шығыс Қазақстан мемлекеттік университетінде «Гигиена және эпидемиология» мамандығы бойынша жоғары білім алды.
Татьяна Николаевна Шығыс Қазақстан облыстық қан орталығында 2001 жылдан бастап қызмет атқарып келеді. Еңбек жолын функционалдық қамтамасыз ету бөлімінің дәрігер-зертханашысы қызметінен бастады. Жоғары кәсіби білімі, жауапкершілігі және мақсаткерлігінің арқасында 2002 жылы бөлім меңгерушісі лауазымына тағайындалды. Кәсіби шеберлігін үнемі арттыруға деген ұмтылысы оны 2003 жылы сапаны бақылау бөліміне алып келді, онда ол дәрігер-зертханашы және дәрігер-бактериолог қызметтерін табысты атқарды.
Қол жеткізген жетістіктерімен тоқтап қалмай, Татьяна Николаевна өз білімін жетілдіруді жалғастырды. 2009 жылы «Ақпараттық технологиялар» мамандығы бойынша екінші жоғары білім алды, ал 2019 жылы Әл-Фараби атындағы Қазақ ұлттық университетін «Менеджмент» мамандығы бойынша экономика және бизнес магистрі дәрежесімен аяқтады.
2011 жылдың қазан айынан бастап Войнова Т.Н. сапаны бақылау жөніндегі директордың орынбасары қызметін атқарды. 2014 жылы «Денсаулық сақтау менеджменті» мамандығы бойынша қайта даярлау курсынан өтті. Оның белсенді қатысуымен орталықта донорларды қолдау және ішкі бақылау қызметі құрылды. Оның басшылығымен ұйымда сапа менеджменті жүйесі (СМЖ) енгізіліп, қан орталығының өндірістік қызметін стандарттайтын әртүрлі деңгейдегі 550-ден астам СМЖ құжаттары әзірленді. Ішкі аудиттер жүргізіліп, донорлармен кері байланыс орнату жұмыстары жолға қойылды. Бұл жұмыстардың барлығы 2017 жылы Шығыс Қазақстан облыстық қан орталығына қан қызметі ұйымдары арасында алғашқы ұлттық аккредиттеуден өтіп, бірінші санат иеленуге мүмкіндік берді. 2020 жылдан 2023 жылға дейін Татьяна Николаевна «Денсаулық сақтау саласындағы сыртқы кешенді бағалау бойынша сарапшылар мен кеңесшілер» ҚБ сарапшысы болып, денсаулық сақтау ұйымдарын ұлттық аккредиттеуге қатысты.
2021 жылдың сәуір айында жоғары кәсібилігі, ұйымдастырушылық қабілеті және көпжылдық адал еңбегі үшін Татьяна Николаевна медициналық бөлім жөніндегі директордың орынбасары қызметіне тағайындалды.
Бүгінде ол кәсіпорын жұмысының тиімділігі мен сапасын арттыруға бағытталған заманауи ұйымдастырушылық тәсілдерді енгізу жұмыстарын табысты үйлестіріп, Шығыс Қазақстан облысындағы 20 денсаулық сақтау ұйымын қан өнімдерімен уақтылы қамтамасыз етуді ұйымдастырады, сондай-ақ орталықтың өндірістік қызметін жоспарлау жұмыстарын үйлестіреді.
Жоғары білікті маман әрі денсаулық сақтау саласының тәжірибелі ұйымдастырушысы Войнова Т.Н. әріптестерінің зор құрметіне ие. Ол Шығыс Қазақстан облысы денсаулық сақтау басқармасының және Шығыс Қазақстан облыстық қан орталығы басшылығының Құрмет грамоталарымен бірнеше рет марапатталған.
Ол «Клиникалық зертханалық диагностика» мамандығы бойынша жоғары біліктілік санатына ие.
Оның марапаттары қатарында: Қазақстан Республикасы Денсаулық сақтау министрінің Құрмет грамотасы (2021 ж.); Қазақстан Республикасы Денсаулық сақтау министрлігінің «Денсаулық сақтау ісіне қосқан үлесі үшін» төсбелгісі (2024 ж.); Қазақстан Республикасы Қан қызметінің 90 жылдығына орай табысталған «Қазақстан Республикасының қан қызметін дамытуға қосқан үлесі үшін» төсбелгісі (2024 ж.) бар.
Войнова Татьяна Николаевнаның кәсіби жолы – өз ісіне деген адалдықтың, үздіксіз дамудың және Қазақстанның денсаулық сақтау жүйесіне жоғары деңгейде қызмет етудің жарқын үлгісі.
