Шығыс Қазақстан облыстық қан орталығының ұжымы «Таза Қазақстан» – World Clean Up Day экологиялық бастамасына қосылды

2025 жылдың 20 қыркүйегінде Қан орталығының қызметкерлері Қазақстан Республикасы Экология және табиғи ресурстар министрлігі ұйымдастырған World Clean Up Day халықаралық акциясына белсене қатысты.Бұл шара еліміз бойынша «Таза Қазақстан» жобасы аясында өткізіліп, тұрғындарды таза әрі қауіпсіз қоршаған орта үшін біріктіруге бағытталған. Бастаманың негізгі мақсаты – қалдықтарды бөлек жинау мен қайта өңдеу мәдениетін қалыптастыру, сондай-ақ әрбір азаматтың өз жерінің тазалығына деген жеке жауапкершілігін арттыру.

Қан орталығының ұжымы бұл бастаманы зор ықыласпен қолдады. Біздің қызметкерлер бір команда болып Өскемен қаласындағы аллеяны тұрмыстық қалдықтардан тазартып, туған қаламыздың тазалығын сақтауға өз үлестерін қосты. Бұл біз үшін тек экологиялық миссия ғана емес, сонымен бірге адамдардың денсаулығына деген қамқорлықтың да көрінісі. Өйткені таза қоршаған орта – толыққанды әрі бақытты өмірдің негізі.

Біз сенімдіміз: адам денсаулығына қамқорлық жасау әрқашан экологияға қамқорлықпен тығыз байланысты. Бүгін біздің ұжым медицина қызметкерлерінің адамдарға да, табиғатқа да бірдей жауапкершілікпен қарайтынын көрсетті.