Жүрек жақсылыққа ашық болса, өмірге тағы бір мүмкіндік беріледі!
«Шығыс Жылу» АҚ кәсіпорнында Қан доноры күні өтті. Бұл — қайырымдылықтың ерекше құндылыққа ие болып, ал жанашырлық өмір үшін жасалған нағыз игі іске айналған күн.
Кәсіпорын қызметкерлері ең қымбат сый — өз қанымен бөлісу үшін жиналды. Бәлкім, бүгін аурухана палатасында бір адам қан құюды күтіп отырған шығар, жақындары оның сауығып кетуін тілеп, ал дәрігерлер өмірін сақтап қалу үшін бар күшін салып жатқан болар. Дәл осы сәтте донор қаны адамға ертеңгі күнге деген үміт сыйлай алады.
“Біз әрдайым кімге көмектесіп жатқанымызды біле бермейміз, олардың қуаныштан төгілген көз жасын да көрмейміз, алғыс сөздерін де естімейміз. Бірақ бұл жасаған жақсылығымыздың маңызын төмендетпейді. Өйткені шынайы мейірімділік ештеңені күтпейді,”- деп атап өтті донорлар.
«Шығыс Жылу» АҚ ұжымына жанашырлығы, адамгершілігі және көмекке мұқтаж жандарға қол ұшын созуға дайын болғаны үшін шын жүректен алғыс айтамыз.
Әрбір донор өз шешімінің біреуге екінші туған күнді, біреуге үйіне оралуға, ал тағы біреуге өмірін бақытты жалғастыру мүмкіндігін сыйлай алатынын білсін.
Үміт сыйлағандарыңыз үшін рақмет! Өмір сүруге көмектескендеріңіз үшін рақмет!
Бір донация — жай ғана қан беру емес. Бұл — басқа адамға сыйланған өмір мүмкіндігі. Баршаңызға зор денсаулық тілейміз! Пациенттердің саулығы үшін өз қанының бір “тамшысын” ақысыз тапсырған әрбір донорға алғысымыз шексіз!
