Кәсібилік, өз ісіне адалдық және үнемі кәсіби дамуға ұмтылыс — Гульдар Укужаровна Матаеваның басты ерекшеліктері
Гульдар Укужаровна медицина саласындағы еңбек жолын 1995 жылы «Медбике ісі» мамандығы бойынша Зырян медицина училищесін үздік бітіргеннен кейін бастады. Жаңа білімге ұмтылу оның кәсіби өмірінің ажырамас бөлігіне айналды: 1999 жылы «Биология» мамандығы бойынша жоғары білім алды, 2009 жылы заңгер дипломын иеленді, ал 2021 жылы Сібір мемлекеттік медицина университетінің «Денсаулық сақтаудағы менеджмент» бағыты бойынша магистратураны бітірді.
Гульдар Укужаровна Шығыс Қазақстан облыстық қан орталығындағы еңбек жолын 2001 жылы дәрігер-зертханашы ретінде бастады. Жоғары кәсібилігінің, жауапкершілігінің және еңбектегі жоғары нәтижелерінің арқасында аз уақыт ішінде қан препараттарын өндіру бөлімін басқарды, кейін фармацевтикалық өнім өндіру цехының меңгерушісі қызметіне тағайындалды.
Оның жетекшілігімен өндірістің технологиялық регламенттері әзірленіп, қан препараттарының сапасы едәуір жақсартылды және ақуыз препараттарын ультрасүзгілеу әдісі өндіріске енгізілді.
2010 жылы өндіріс қайта ұйымдастырылғаннан кейін Гульдар Укужаровна иммунологиялық зертханада еңбек жолын жалғастырып, трансфузиялық жолмен берілетін жұқпаларды диагностаумен және зертханалық зерттеулердің сапасын бақылаумен айналысты. Оның тікелей қатысуымен 2011 жылы донорлық үлгілерді мұрағаттау жүйесі енгізіліп, бұл зертханалық диагностиканың сараптамалық бағалау сапасын едәуір арттыруға мүмкіндік берді.
2012 жылдан бастап Гульдар Укужаровна жұқпаларды диагностау зертханасын басқарды. Дәл оның жетекшілігімен жоғары технологиялық автоматтандырылған жүйелерде ИХЛТ және ПТР заманауи әдістерін қолдана отырып, донорлық қанды екі кезеңді скринингтен өткізу жүйесі енгізілді. Бұл қан компоненттерінің жұқпалық қауіпсіздігін қамтамасыз етудегі және қан қызметі жұмысының сапасын арттырудағы маңызды кезең болды.
2022 жылғы қаңтардан бастап Гульдар Укужаровна Донорларды қолдау және ішкі бақылау қызметін басқарады. Қазіргі уақытта ол сапа менеджменті жүйесінің жұмысын үйлестіреді, шығарылатын өнімнің қауіпсіздігін бақылауды қамтамасыз етеді, сондай-ақ қан донорлығы мәселелері бойынша азаматтар мен ұйымдардың өтініштерімен жұмыс жүргізеді.
Негізгі қызметімен қатар, 2018 жылдан бастап Гульдар Укужаровна зертханалық диагностика саласы бойынша Ұлттық аккредиттеу орталығының техникалық сарапшысы болып табылады. 2015–2026 жылдары Шығыс Қазақстан облыстық қан орталығының Этика комиссиясын басқарады.
Көп жылғы адал еңбегі, жоғары кәсібилігі және қан қызметін дамытуға қосқан елеулі үлесі үшін Гульдар Укужаровна Халықаралық Ұлттық бизнес-рейтингтер одағының «Жыл маманы» атағына ие болды. Ол Шығыс Қазақстан облысы Денсаулық сақтау басқармасының және Қан орталығы басшылығының Құрмет грамоталарымен бірнеше мәрте марапатталған. 2024 жылы Қазақстан Республикасы Қан қызметінің 90 жылдығына орай «Қазақстан Республикасы қан қызметін дамытуға қосқан үлесі үшін» төсбелгісімен марапатталды.
Бүгінде Гульдар Укужаровна – жоғары білікті маман, білікті басшы және әріптестері арасында зор құрметке ие тұлға. Оның кәсіби жолы – өз ісіне адалдықтың, үздіксіз дамудың және донорлардың қауіпсіздігі мен пациенттердің денсаулығы жолында кемелдікке ұмтылудың жарқын үлгісі.
